Плиты Гацыры куыстытӕ сты национ гуманитарон хӕзнадоны ӕнӕфӕхицӕнгӕнӕн хай ӕмӕ Ирыстоны культурон ӕмӕ зонадон царды ахсынц бӕрзонд бынат. Уый банысан кодта Хуссар Ирыстоны президент Гаглойты Алан йæ арфӕйы филолог зонӕдты кандидат, профессор Плиты Гацырӕн йӕ 90-азон юбилейы цытӕн.
Республикæйы раздзог бахахх кодта, Гацыр кæй у ирон интеллигенцийы зынгӕ минӕвар, номдзыд литературон ӕмӕ театралон критик, профессор, публицист ӕмӕ ирон литературӕйы ӕвӕллайгӕ иртасӕг.
«Дӕ цардвӕндаг, дӕ бирӕвӕрсыг архайд ӕвдисынц, кӕй дӕ ирон культурӕ ӕмӕ ирон дзырдыл ӕнувыд ӕцӕг намысджын ӕмӕ принципиалон ахуыргонд ӕмӕ патриот. Ды дӕ алы къахдзӕфӕй дӕр цырын кӕныс иртасджытӕ, ахуыргӕндтӕ ӕмӕ культурӕйы архайджыты ӕвзонг фӕлтӕры удтӕ. Ацы цытджын ӕмӕ нысаниуӕгджын бон дын зӕрдӕбынӕй бузныг зӕгъын дӕ бирӕазон ӕмӕ ӕнувыд архайды тыххӕй», - дзырдӕуы арфӕйы.
Президенты зӕрдӕ загъта ахуыргондæн ӕнӕфӕцудгӕ ӕнӕниздзинад, бирӕ азты цӕрӕнбон, удвидардзинад ӕмӕ ног сфӕлдыстадон ӕнтыстытӕ.
